ليلة منام سيدنا النبي
رائعــــة الشاعر أبوخلاد هشام فتحي
" عضو الاتحاد العالمي للثقافة والآداب "
----------------------------------------------
ليلة منام سيدنا النبي
ليلة منام سِدنا النبي
شفت الشجرْ
وسمعت غنوة من لسان عصفورْ
وكأن نجمة في السما
بين الفلك بتدورْ
لمسة حنان عدت هنا
ولا فيش ملاك ولا حورْ
شايف بباب الخلق
حاجة بتتولد
بينها وبين الخلق سورْ
يا أهل المنام
سايق عليكم فرحتي
إيه الحكايه أنا شفت نور
طب يعني إيه
النجمة هاربة في السَمَا
تفسيره إيه
الغنوة والعصفور
أمي الحبيبة تقول لِي قوووووووووول
وأنا قلبي يحكي فرحتي
تشهد ملامح جدتي
وتقول لي مش معقول
افرح يا واد
د النور ده هُوْ
سِدنا الرسولْ
لو كنت حاسس
في الزمان ده بأي ضيقْ
تايه وبتعدي البحار
عايش غريقْ
دوّر على سيرة النبي
وافتح كتاب اسمه (الرحيق)
هتلاقي معنى للحياه
كل الهموم بتزولْ
************
لِيلةْ مَنام سِدنا النبي
قلبي اللي بيرفرف عليك
ويحن ليك
أمي الحبيبة
تقول لِي أوعى تسيب يا واد
سنةْ نبيكْ
فرحانة بيكْ
تفتح كتاب سِدنا النبي
صلت عليكْ
يا سلام على سيرة النبي
كان عمري يوم ما عرفته
واتربيت عليه أربع سنينْ
جارنا اللي وصّانا النبي
نحسن إليهْ
لو غاب ندق الباب
ونطّمن عليهْ
لو حتى مين.....
كان عمري قال أربع سنين
وعرفت أنا حق الطريقْ
ولا عمري خنت ف يوم صديقْ
سِدنا النبي علمني
أحب الطيبين
علمني كيف القلب يصفى
والصحاب متجمعين
علمنا لو جانا الغضب
نحبس غضبْ
مهما اللي كان
لازم نلين
كان عمري قال أربع سنين
جارنا اللي ساكن
جنب بيتنا "بنيامين"
وأمي الحبيبة تقول يا واد
سلِّمْ عليهْ
لو شفته مره في الصباحْ
صبّح عليهْ
لاجل النبي
لازم تكون للجار أمين
********************
من كام سنه
رسموا النبي
إلا النبي يا أهل الكتابْ
وحْياةْ كتاب الله
تهون النفس
ويهون العذابْ
لأجل النبي ترخص حياتنا
والشيوخ قبل الشبابْ
مين اللي قال
وصّى على أهل الكتاب
غير النبي
يا أهل الكتابْ
*************
دانا نفسي أشوفه
واعتذر لُه
مره تانية في المنامْ
وأنا غصْب عني
بين بحور الشعر
بغرق في الملامْ
كان عمري قال
تلاتين سنة
ولا عندي غضبة بتنتفض
غير الكلام!!!!!!
كلمة وقالتها جدتي
لحمك ودمك يا ولد
سنة نبيكْ
واوعاك تسيب حق النبي
ويهون عليكْ
دانت اللي شفته في المنام
دلوقت واقف بعتذر
غضبي كلام
أسفي كلام
أصل الحكاية
الصمت واكل غضبتي
والشعر برضه
كان كلام في كلام
الثلاثاء الموافق:
9-11-1433 هـ
25-9-2012م
الإثنين أبريل 29, 2024 12:01 am من طرف 
موضوع: ليلة منام سيدنا النبي رائعــــة الشاعر أبوخلاد هشام فتحي " عضو الاتحاد العالمي للثقافة والآداب " 
